Bahaghari

Ako ay dumating sa Buhay Mo

Dala-dala ang krayola na pula

Handa nang kulayan ang mistulang abo mong pagkatao

Kahit hindi mawari ang kung ano ang siyang mapapala

Kislap ng iyong mga mata

Mga labing halos mapunit sa pagngiti

Mga tawa na animo'y musika sa aking mga tainga

Sa pagkulay saiyo ng pula—ako nga'y nagwagi

Ako'y natutuwa tuwing ang iyong ngiti'y nasisilayan

Masasabi kong "ako sayo'y naging kuntento"

At sa pagkakataong luha mo'y mapagmasdan

Tila unti-unting napudpod ang krayolang pula na dala ko— paano na ba ito?

Panahon ay mabilis na lumipas

Mga bagong taong kukulay sayo'y natagpuan

"Anong malas nga naman" ang tangi kong nabigkas

Ngayo'y sila na ang nagkulay saiyo nang tuluyan

Dalandan na nagpapagaan ng nararamdaman

Dilaw na lalong nagpatingkad sa iyong ngiti

Berde na nagpamalas sa iyo kung paano pahalagahan

Asul na walang ibang hinangad kundi sayo'y maging bahagi

Indigo na itinutulak kang gawin ang gusto mo

At ang Lila na siyang nagbigay sa iyo ng tunay nakalayaan

Sila ang iba pang naging parte ng iyong pagbabago

Mga naging kahati ko sa iyong kabuoan

Pula, dalandan, dilaw,­ berde, asul, indigo at lila

Mga kulay na tuluyang nagpaliwanag sa pagkatao mo

Ngunit tanging hangad ko lang ang makita kang masaya

Kahit hindi nalang ako ang nagkulay sa mundo mo

Sa lahat ng ito isa lang ang habilin ko sa iyo

Katulad ng bahaghari sa langit,

Kahit gaano man kalakas ang ulang dadaan sa buong mundo,

Tumayo ka at sumibol muli— dahil iyang pait at pasakit ay dadaan lamang saglit